Қазақ файтері UFC турнирінде Хабибтің командасынан шыққан қарсыласпен айқасады
Қазақстандық файтер Азат Мақсұм UFC тарихындағы маңызды турнирге қатысады. Оның қарсыласы – Хабиб Нурмагомедовтің командасынан шыққан Ресей спортшысы Тагир Уланбеков. Жекпе-жек 22 маусым күні Әзербайжанда өтеді.
Мақсұмның UFC-дегі жолы: дебют және екінші сынақ
Азат Мақсұм UFC-дегі алғашқы жекпе-жегін 2023 жылдың шілде айында өткізді. Ол кезде қазақстандық спортшы Тайсон Нэмді (21-14) төрешілердің бөлек шешімімен жеңіп, жарқын дебют жасаған еді. Бірақ содан кейін тек бір жекпе-жек өткізіп, Чарльз Джонсонға (17-7) ұпай санымен жол берген.
Тарихи турнир және мықты қарсылас
MMA әлеміндегі беделді инсайдерлік ақпарат көздерінің бірі – Red Corner MMA мәлімдеуінше, Азат Мақұм 22 маусым күні UFC тарихында алғаш рет Әзербайжанда өтетін турнирде октагонға қайта оралады.
Оның қарсыласы – Тагир Уланбеков (16-2), UFC рейтингінде ең жеңіл салмақта 10-орында тұрған тәжірибелі файтер. Уланбеков – Хабиб Нурмагомедов пен Ислам Махачев сынды атақты дағыстандық чемпиондардың серіктесі.
Уланбеков соңғы жекпе-жегін 2024 жылдың 18 қаңтарында өткізіп, Клэйтон Карпентерді (8-1) төрешілер шешімімен жеңіп шыққан.