100 гол! Холанд АПЛ рекордын жаңартты
Норвегиялық форвард бұл көрсеткішке бар болғаны 111 матчта жетіп, Алан Ширердің тарихи рекордын бұзды.
«Манчестер Сити» шабуылшысы Эрлинг Холанд Англия Премьер-лигасы тарихында ең жылдам 100 гол соққан футболшы атанды. Норвегиялық форвард бұл көрсеткішке бар болғаны 111 матчта жетіп, Алан Ширердің тарихи рекордын жаңартты.
АПЛ-дың 14-туры аясындағы «Манчестер Сити» – «Фулхэм» кездесуінде Холанд 17-минутта Жереми Докудан тамаша пас алып, гол соқты.
Бұл соққы — оның АПЛ-дегі 100-ші добы. Осылайша 25 жастағы норвегиялық футболшы Англия чемпионаты тарихында ең жылдам жүздікке жеткен ойыншы атанды.
Бұған дейін рекорд Алан Ширерге тиесілі болған — ол 100 голға 124 матчта жеткен еді.
Голдан кейін — YouTube-тағы рекорд
Футбол алаңындағы табыстан бөлек, Эрлинг Холанд интернетте де жаңа белесті бағындырды. Ол алтын YouTube батырмасын иеленді — себебі арнасына 1 миллионнан астам адам жазылған.
Холанд өз арнасын 10 қыркүйекте ашып, алғашқы видеосын 23 қазанда жариялаған. Нәтижесінде ол бар болғаны 35 күнде миллион жазылушы жинап, бар-жоғы үш бейнероликпен рекорд орнатты.
Маусымдағы статистика
Ағымдағы АПЛ маусымында Холанд:
- 12 матч өткізіп,
- 14 гол соқты.