Жәнібек Әлімханұлы Айтжановтың мансабына қалай әсер еткенін айтты
IBF және WBO нұсқалары бойынша бұрынғы әлем чемпионы Қазақстанның еңбек сіңірген жаттықтырушысы Мырзағали Айтжановпен бірге өткізген жаттығуларын еске алды.
"Ең бастысы — адам бол"
Жәнібек Әлімханұлы Мырзағали Айтжановпен алғаш рет Қазақстан құрамасына шақырылған кезде жұмыс істей бастағанын айтты. Сол кезеңде бапкер Лондон Олимпиадасынан оралған.
"Мырза ағай ол кезде Лондон Олимпиадасынан келген болатын. Мен ұлттық құрамаға алғаш рет шақырылған едім. 2013 жылы құраманың толық мүшесі болдық. Содан бастап ол бізді жаттықтыра бастады. Лапа ұстап, мені көбіне ауыр соққыларға жұмыс істететін", — деді боксшы.
Әлімханұлының сөзінше, Айтжанов әр боксшыға жеке дайындық бағдарламасы қажет екенін үнемі айтып отырған. Сонымен бірге барлық боксшыға бірдей көңіл бөліп, олардың шеберлігін дамытуға уақыт таба білген.
"Ол: "Әр жігіт жеке жаттығуы керек, ал біз бапкер ретінде оған көмектесеміз", — деп айтатын. Бәріне үлгеріп, әр боксшыны белгілі бір деңгейде дайындайтын. Бізге ең жиі қайталаған сөзі — "Адам бол". Ең бастысы — адам бол, мықты бол және шыда", — деп еске алды Жәнібек.
Айтжанов ұлттық құраманы екі кезеңде басқарды
Мырзағали Айтжанов Қазақстан ерлер құрамасының бас бапкері қызметін екі рет атқарды:
- 2009–2018 жылдары;
- 2023 жылдың қаңтарынан 2024 жылдың тамызына дейін.
Оның жетекшілігімен Қазақстан құрамасы Олимпиада ойындарында екі алтын медаль жеңіп алды. 2012 жылы Лондонда Серік Сәпиев чемпион атанса, 2016 жылғы Рио Олимпиадасында Данияр Елеусінов жеңіс тұғырының ең биік сатысына көтерілді.
Айтжанов басқарған кезеңде қазақстандық боксшылар әлем чемпионаттарында бес алтын медаль иеленді.
2013 жылы Алматыда өткен дүниежүзілік додада ұлттық құрама төрт чемпион шығарды. Тағы бір алтын жүлде 2017 жылғы әлем чемпионатында жеңіп алынды.
Қазақстан құрамасы 2014 жылы Оңтүстік Кореяның Инчхон қаласында ұйымдастырылған Азия ойындарында да үздік нәтиже көрсетті. Команда алты алтын медаль алып, жалпыкомандалық есепте бірінші орынға ие болды.
Осындай жетістіктерінің арқасында Мырзағали Айтжанов 2013 және 2014 жылдары қатарынан екі рет әлемнің үздік жаттықтырушысы деп танылды.