Күн ішіндегі екінші отставка: "Атырау" бас бапкерімен қоштасты
ҚПЛ-2025 маусымында "Атырау" футбол клубын жаттықтырған Константин Горовенко қызметінен кетті. Бұл – Қазақстан премьер-лигасындағы бір күн ішінде тіркелген екінші бапкерлік отставка.
Клуб басшылығы 48 жастағы қазақстандық маманның өз еркімен қызметінен кеткенін мәлімдеді. Бұл туралы ақпаратты KazFootball.kz жазады.
Горовенко биылғы маусым басталар алдында “Атырау” тізгінін қолға алған еді. Ол командамен екі оқу-жаттығу жиынын өткізді. Бірақ нәтиже көңіл көншітпеді.
Бапкердің басқаруымен “Атырау” чемпионат аясында 6 матч, сондай-ақ бір кубоктық кездесу өткізді. Алайда бұл ойындардың тек біреуінде жеңіске жете алды.
Клубтың ресми мәліметінше, қазір бас бапкердің міндетін уақытша атқару Денис Мамоновқа жүктелді. Алдағы матчтарда дәл осы маман команданы алаңға бастап шығады.