Аралар алаңды басып алды! Үндістандағы матч шұғыл тоқтатылды (ВИДЕО)
Үндістанда футболдан өткен матч барысында алаңға аралар ұшып келіп, ойын уақытша тоқтатылды.
Суперкубоктың ширек финалында “Интер Каши” мен “Мумбаи Сити” командалары кездескен болатын. Кездесу барысында, 28-минутта стадионда ара үйірі пайда болды. Бұл күтпеген жағдай жанкүйерлер мен төрешілерді әбігерге салды.
Ойын уақытша тоқтатылды. Бірақ аралар қайта оралып, жанкүйерлер мен төрешілер бригадасына шабуыл жасады. Көрермендер шұғыл трибуналарды тастап шықты, ал төрешілер шөпке жата қалып, бастарын дымқыл сүлгілермен жауып қорғануға мәжбүр болды.
Матч тек төрешілер өздерінің сары түсті формасын қара түстіге ауыстырғаннан кейін қайта жалғасты. Аралар сары түске тартылады деген болжам бойынша осындай шешім қабылданған.
Нәтижесінде “Мумбаи Сити” командасы “Интер Кашиді” 1:0 есебімен жеңіп, Суперкубоктың жартылай финалына жолдама алды.