"Барыс" ең қымбат легионермен қоштасады – инсайдерлік ақпарат
23.03.2025, 20:40
Астаналық "Барыс" клубы ресейлік шабуылшы Дамир Жафяровпен келісімшартты ұзартпайды.
hcbarys.kz
Инсайдерлік деректерге сүйенсек, Жафяровтың "Барыспен" келісімі 31 мамырда аяқталады және клуб оны ұзартуға ниетті емес. Бұған басты себеп – ойыншы мен бапкер арасында сенімсіздік орнауы.
"Бапкер ойыншыға сенбейді, ал ойыншы бапкерге. Мұнда өзара түсініспеушілік бар секілді", – делінген хабарламада.
31 жастағы ресейлік хоккейші биылғы маусымда бар болғаны 27 матчқа қатысып, 1 шайба салып, 4 нәтижелі пас берген. Бұл – 68 ойынның тек үштен бірі ғана.
"Спорт-Экспресс" мәліметінше, Жафяров "Барыстағы" ең жоғары жалақы алған хоккейші болған. Оның маусымдық табысы 50 миллион рубль (шамамен 299 миллион теңге).