Чемпиондар лигасының жеңімпазы Қазақстан құрамасын жаттықтыруды жалғастыра береді
Қазақстан волейбол федерациясы (ҚФВ) ерлер және әйелдер ұлттық құрамаларының бас бапкерлерімен келісімшартты ұзартты.
ҚФВ вице-президенті Ермек Сырлыбаевтың мәліметінше, Қазақстанның ерлер және әйелдер волейбол құрамаларының бас бапкерлері алдағы халықаралық маусымда өз қызметін жалғастырады.
Айта кетейік, әйелдер ұлттық құрамасын бірнеше жылдан бері "Берель" клубының жаттықтырушысы Ришат Гилязутдинов басқарып келеді. Ал ерлер құрамасының тізгінін "Жайық" командасының бапкері Виктор Козик ұстап отыр.
Ришат Гилязутдинов – Алматы қаласының тумасы. Ол 14 жыл бойы "Динамо" (Қазан) клубының бас бапкері болған. Осы уақыт ішінде Чемпиондар лигасын (2014), Клубтық әлем чемпионатын (2014) және Ресей чемпионатын алты рет жеңіп алды.
Виктор Козик – бұрынғы қазақстандық волейболшы. Ол Францияның "Бордо" клубын басқарған, сондай-ақ бірқатар ресейлік командаларда жұмыс істегеді.