"Нәтижелер көңіл көншітпейді": Спорт министрі Қазақстан тарихындағы ең сәтсіз Азия ойындарын сынға алды
Астанада IX қысқы Азия ойындарының қорытындысы мен 2026 жылғы қысқы Олимпиадаға Қазақстан құрамасының дайындығы талқыланған кеңес өтті.
Қазақстан құрамасының Азия ойындарындағы нәтижесі
Қытайдың Харбин қаласында өткен қысқы Азия ойындарында Қазақстан жалпыкомандалық есепте 4-орынға тұрақтады.
Биатлон, конькимен жүгіру және фристайл-акробатика спорт түрлерінде отандастарымыз жүлделі орындарға ие болды.
Алайда бірқатар спорт түрлерінде медальсіз қалғанымыз алаңдаушылық тудырды, – деп мәлімдеді ҚР Мәдениет және спорт министрлігінің баспасөз қызметі.
Министрлік сыны және себептерді талдау
ҚР Спорт және мәдениет министрі Ербол Мырзабосынов кейбір спорт түрлеріндегі нәтижелердің қанағаттанарлықсыз екенін айтып, жағдайды терең талдау қажеттігін атап өтті:
"Федерацияларға барлық қажетті жағдай жасалған, мамандар мен заманауи техникамен қамтамасыз етілген. Бірақ кейбір спорт түрлерінде нәтижелер көңіл көншітпейді. Бұл жағдайдың себептерін жан-жақты зерттеу қажет", – деді министр.
2026 жылғы Олимпиадаға дайындық шаралары
Қысқы Олимпиада ойындарына бір жылдан аз уақыт қалды. Осыған байланысты Ербол Мырзабосынов:
- Барлық қысқы спорт федерациялары мен аймақтық спорт басқармаларына дайындықты күшейтуді тапсырды;
- Олимпиада лицензиясына үміткерлерге жеке дайындық жоспары әзірленгенін мәлімдеді;
- Әр спортшыға жеке бақылау орнатылады, оның ішінде:
— Қажетті инвентарьмен қамтамасыз ету;
— Медициналық бақылау (WADA талаптарына сай дәрі-дәрмектер мен спорттық тамақтану);
— Психолог, диетолог және дәрігерлердің кеңестері;
— Жеке жаттықтырушылардың қажеттілігіне қарай оқу-жаттығу жиындары мен іссапар шығындарын жабу.
"Спортшылардың бәсекеге қабілеттілігін арттыру үшін инновациялық әдістер мен ғылыми негізделген тәсілдерді енгізу қажет", – деп түйіндеді министр.
XXV Қысқы Олимпиада ойындары 2026 жылдың 6-22 ақпан аралығында Италияның Милан және Кортина-д’Ампеццо қалаларында өтеді.