17-орыннан – финалға! Аяна Жолдастың керемет камбэгі (ВИДЕО)
Қазақстандық фристайл шебері Аяна Жолдас Швейцарияда өтіп жатқан әлем чемпионатында финалға жолдама алды. Спортшы қиын сәтте мінез көрсетіп, басты кезеңге өтті.
2025 жылғы 18–30 наурыз аралығында Швейцарияның Энгадин өңірінде фристайлдан әлем чемпионаты өтіп жатыр. Шаңғы акробатикасынан әйелдер арасындағы жарыста 12 финалист анықталды. Олардың қатарында — Қазақстан намысын қорғап жатқан Аяна Жолдас та бар.
Алғашқы іріктеу кезеңінде Аяна сәтсіз өнер көрсетіп, 17-орын иеленді. Бірақ шешуші сәтте шеберлігін танытып, екінші мүмкіндік кезеңінде "лузер раундта" үздік бестікке енді. Осы нәтижесі оған финалға жолдама әперді.
Шешуші жарыс 30 наурыз күні өтеді. Аяна Жолдас — бұл кезеңде медаль үшін таласатын 12 спортшының бірі.
Еске сала кетейік, Оңтүстік Қазақстан облысының тумасы, 23 жастағы Аяна Харбиндегі Азия ойындарында үш бірдей медаль жеңіп алған: екі “қола” және бір “күміс”.