Әйелдер теннис қауымдастығы (WTA) 2026 жылдың алғашқы әлемдік рейтингін жариялады.
Жаңартылған тізімде көшбасшылықты Беларусь өкілі Арина Соболенко иеленсе, екінші орында – польшалық Ига Швёнтек. Үшінші сатыға америкалық Аманда Анисимова көтерілді.
Қазақстанның бірінші ракеткасы Елена Рыбакина жекелей сында бесінші орнын сақтап қалды. Ал Юлия Путинцева үш саты төмендеп, 74-орынға түсті.
Жұптық рейтингте чехиялық Катержина Синякова көш бастап тұр. Екінші орында – АҚШ өкілі Тейлор Таунсенд, үшінші орынды италиялық Жасмин Паолини мен Сара Эррани бөлісіп отыр.
Қазақстандық жұптық теннистен Анна Данилина бір саты жоғарылап, 14-орынға тұрақтады. Юлия Путинцева да бір позицияға көтеріліп, 106-орынға шықты. Жібек Құламбаева 136-орыннан 134-ке жақсарды. Ал Рыбакина жұптық рейтингте үш сатыға көтеріліп, 265-орынға жайғасты.