Қазақстандық теннисші финалдық бәсекеде үш сет қорытындысы бойынша жеңіліс тапты.
Әлемнің 71-ракеткасы, қазақстандық теннисші Юлия Путинцева Австралияның Брисбен қаласында өтетін WTA 500 санатындағы турнирдің іріктеу кезеңіндегі шешуші матчты өткізді.
Турнирдің негізгі кезеңіне жолдама алу үшін Путинцева рейтингте 206-орында тұрған австралиялық Оливия Гадекимен кездесті. Алғашқы партияда Юлия айқын басымдық танытып, 6:1 есебімен жеңіске жетті. Екінші сетте Гадеки мықтырақ болып, 7:5 есебімен басым түсті. Ал шешуші үшінші сетте де Оливия 6:1 есебімен жеңіске жетті.
Осылайша, Юлия Путинцева Brisbane International турнирінің негізгі торына өте алмады. Турнир 4–11 қаңтар аралығында өтеді.
Еске сала кетейік, Юлия Путинцева Брисбендегі іріктеу кезеңін жергілікті теннисші, әлемдік рейтингте 119-орында тұрған Присцилла Хонды 6:4, 6:3 есебімен жеңуден бастаған еді.