Жапон файтері айқас алдында Қаршыға Дәуітбекке ескерту жасады
10 қыркүйекте Осакадағы Super RIZIN 5 турнирінде тәжірибелі Қаршыға Дәуітбек пен Жапониядағы ең танымал ММА файтерлерінің бірі Рен Хирамото өзара мықтыны анықтайды.
Жапониялық ММА файтері Рен Хирамото қазақстандық нокаутшы Қаршыға Дәуітбекпен өтетін жекпе-жек алдында өз жоспарын айтып, октагонда нағыз айқас ұйымдастырғысы келетінін мәлімдеді.
Қос файтер 10 қыркүйекте Жапонияның Осака қаласында өтетін Super RIZIN 5 турнирінде кездеседі. Хирамото отандастарының алдында жеңіске жететініне сенімді.
"Бұл нағыз шайқас болғанын қалаймын"
Жекпе-жек алдындағы баспасөз мәслихатында Рен Хирамото Дәуітбекпен кездесудің оңай болмайтынын мойындады. Соған қарамастан, жапониялық спортшы ауыр айқасқа дайын екенін жеткізді.
"Қатаң әрі ауыр жекпе-жек күтемін. Екеуміз нағыз соғыс, нағыз шайқас ұйымдастырғанымызды қалаймын. Сол шайқаста басым түсетініме сенемін. Мен айқасқа дайынмын және міндетті түрде жеңемін", – деді Хирамото.
Жапониялық файтердің кәсіпқой ММА-дағы көрсеткіші – 4 жеңіс және 3 жеңіліс.
Қаршыға Дәуітбек – қауіпті нокаутшылардың бірі
Қазақстандық Қаршыға Дәуітбек бұл кездесуге 19-3 рекордымен келеді. Оның 19 жеңісінің 15-і нокаут немесе техникалық нокаутпен аяқталған.
Соңғы жекпе-жегінде Дәуітбек 18 шілдеде Хиросимада өткен RIZIN Landmark Vol. 15 турнирінде жапониялық Кехэй Хагивараны бірінші раундта нокаутқа жіберді.
Рен Хирамотомен кездесу Қаршыға Дәуітбектің RIZIN ұйымындағы сегізінші жекпе-жегі болмақ.
Қазақстандық файтер осы уақытқа дейін промоушенде бес рет жеңіске жетіп, бір рет жеңілген, тағы бір кездесуі өтпеді деп танылды.