Головкиннің боксты Олимпиадада сақтап қалудағы рөлі белгілі болды

Бүкіләлемдік бокс кеңесінің (WBC) президенті Маурисио Сулейман World Boxing ұйымының күш-жігерінің арқасында бокс Олимпиада ойындарының бағдарламасында қала береді деп үміт білдірді.

Сулейман кәсіби боксшылардың Олимпиадаға қатысуына қарсы екенін тағы да айтты, сондай-ақ бұрынғы әлем чемпионы Геннадий Головкиннің боксты олимпиадалық спорт түрі ретінде сақтап қалудағы үлесіне жоғары баға берді. 

«Олимпиада ойындарындағы бокс та, кәсіби бокс та болуы керек. Бірақ оларды бірге емес, бөлек қарастырған жөн. Бірінде сіз медаль үшін, ал екіншісінде — әлем чемпионы атағы үшін күресесіз. Ұлы әуесқой боксшыларсыз даңқты кәсіби чемпиондар пайда болмайды. Тарих көрсеткендей, Мұхаммед Әли, Джо Фрейзер, Нино Бенвенути, Паскуаль Перес, Эвандер Холифилд және Оскар де ла Хойя сияқты олимпиада чемпиондары ақырында кәсіби бокста да ұлы чемпионға айналды. Сондықтан біз ұлы чемпиондардан қолдау іздеп жатырмыз. Геннадий Головкин осыған үлгі бола ала ма? Иә, және оның қазіргі World Boxing Олимпиадалық комитетінің төрағасы ретіндегі мәртебесі біз үшін тамаша «серіктес», дәлірек айтқанда, олимпиададағы бокстың үлкен серіктесі. Олимпиадалық бокс өзінің ұлы тарихын жалғастыруы керек, себебі әуесқой бокс тек бизнеске бағытталса, спортшыларға қиындықтар туғызады», - деді Сулейман.

Естеріңізге сала кетейік, GGG жақында World Boxing Олимпиадалық комитетінің төрағасы болып тағайындалып, жаңа қызметтегі басты мақсаты - Олимпиада ойындарында боксты сақтап қалу деген болатын.