UFC президенті қазақстандық дебютанттың әсерлі нокаутына реакция білдірді (ВИДЕО)
Қазақстандық жартылай ауыр салмақтағы Дияр Нұрғожайдың (10-0) UFC-дегі дебютіне санаулы күндер қалды. Осыған орай "UFC Eurasia" телеграм-арнасы оның былтырғы керемет жеңісінің видеосын қайта жариялады.
2024 жылдың қазан айында Дияр Нұрғожай Дана Уайттың Үміткерлер сериясында (DWCS) Польшадан келген Бартош Шевчикті әсерлі хайкикпен нокаутқа жіберген. Қарсыласын құлатқаннан кейін партерде соққыларын жалғастырып, техникалық нокаутпен жеңіске жетті.
Видеода UFC президенті Дана Уайттың қазақстандық файтердің эмоционалды жеңісіне таңданысын жасырмағанын көруге болады. Ол бұл сәтке өзіндік реакция білдіріп, жанкүйерлер арасында қызу талқылауға себеп болды.
UFC-дегі алғашқы жекпе-жек қашан өтеді?
Дияр Нұрғожайдың UFC-дегі алғашқы жекпе-жегі 15-16 наурыз күндері өтетін Fight Night 254 (UFC Vegas 104) турнирінде болады. Оның қарсыласы тәжірибелі бразилиялық Брендсон Рибейро (16-7).