Әйгілі ресейлік бапкер Алматыда Денис Теннің рухына тағзым етті

Денис Теннің спорттағы алғашқы қадамдары ресейлік жаттықтырушы Елена Водорезованың жетекшілігімен басталғаны белгілі. Сол кезеңде ол Татьяна Тарасовадан еркін бағдарламалар мен композицияларды қоюға көмектесуді өтінген. Кейіннен Тен өзінің шығармашылық идеяларын да ұсынып, жаттықтырушыларымен бірлесе жұмыс істеген.

Жасына және денсаулығына қарамастан, Тарасова биылғы турнирге өзі келіп қатысты. Ол Алматыдағы Құрманғазы мен Байсейітова көшелерінің қиылысында орналасқан Денис Тен ескерткішіне барып, суретке түсіп, оны әлеуметтік желідегі парақшасына жариялады. Жаттықтырушы суретті қысқа ғана «Дениске қонаққа келгенде» деп жазған.

Баспасөз мәслихатында сөз сөйлеген Татьяна Анатольевна Денис Теннің даралығын ерекше атап өтті:

“Денистің табиғи таланты ерекше еді. Ол бәрібір шыңға шығатын спортшы болатын. Музыканы терең сезіну қабілеті мен мұздағы орындау мәнері өзгеше еді. Егер ғұмыры қысқа болмаса, ол әлі талай жетістікке жетіп, бізді таңғалдыра беретін еді. Ең қиыны – оны өмірден айырған адамдар әлі тірі, ал Денис қасымызда жоқ. Бұл – әділетсіздік,” – деді Тарасова көзіне жас алып.