«Ордабасы» легионерлері ай сайын ₸20 млн алып отырған. Прокуратура кімді соттамақшы?
«Ордабасының» проблемасы Шымкентке Ғабит Сыздықбеков әкім болып тағайындалған кезден басталған еді.
Осыдан екі жыл бұрын тарихында алғаш рет ел чемпионы атанған шымкенттік «Ордабасы» футбол клубы дәл қазір үлкен дағдарысты бастан өткеріп жатыр. Маусым басында жанкүйерлеріне «екі дүркін чемпион боламыз» деп уәде берген команда қазір турнирлік кестенің ең соңғы сатысында келеді.
Естеріңізде болса, былтыр да «Ордабасы» чемпионат соңына дейін көш басында келіп, жарыс аяқталуға 4-5 тур қалғанда, ашығын айтқанда, «шіріді». Маңызды барлық матчта жеңіліп, турнирді төртінші орынмен бір-ақ аяқтады.
«Ордабасының» проблемасы Шымкентке Ғабит Сыздықбеков әкім болып тағайындалған кезден басталды десек қателеспейміз. Жаңа әкім қала бюджетіне толықтай аудит жасап, шығынның бәрін майшаммен тексерген сияқты. Өйткені, содан бастап экс-президент Бауыржан Абдубаитовтың басына қара бұлт үйіріле бастады. Көп ұзамай ол отставкаға кетті. Бірақ жай кетпепті, бәрін былықтырып кеткенге ұқсайды.