"Ордабасы" ФК экс-президентіне қатысты қылмыстық іс қозғалды
Шымкенттік клубтың бұрынғы президенті Бауыржан Әбдубаитовқа қатысты сыбайлас жемқорлыққа қарсы қызмет (Антикор) тергеу жүргізіп жатыр.
Қаржылық бұзушылықтар мен негізсіз бонустар
Шымкент прокуратурасының хабарламасына сәйкес, Әбдубаитов клуб президенті қызметін атқарып жүрген кезде басшылық өкілеттігін асыра пайдаланып, директорлар кеңесінің шешімінсіз футболшылармен ірі көлемдегі бонус қарастырылған келісімшарттар жасасқан.
Тергеу нұсқасы бойынша:
- 21 футболшымен жалпы сомасы 2,3 млрд теңге болатын сыйақы келісімдері бекітілген;
- Бұл қаражат мемлекеттік бюджет есебінен төленген.
Конференциялар лигасына бөлінген қаражаттың да сұрауы бар
Бұрынғы басшыға тағылып отырған тағы бір айып – 1,2 млрд теңгені мақсатсыз пайдалану. Бұл сома Еурокубок аясындағы Конференциялар лигасының кезеңіне қатысуға бөлінген. Бірақ қаражаттың нақты турнирге емес, футболшыларға үстемақы төлеуге және клубтың салық қарызын жабуға жұмсалғаны анықталған.
Қылмыстық іс қандай баптармен қозғалды?
Антикор ҚР Қылмыстық кодексінің:
- Қызметтік өкілеттікті асыра пайдалану,
- Билікті немесе лауазымдық өкілеттікті теріс пайдалану баптары бойынша алдын ала тергеу жұмыстарын жүргізуде.
Еске салайық, Бауыржан Әбдубаитов “Ордабасы” клубының президенті қызметін 2022 жылдан 2024 жылға дейін атқарған.