Бақтиер Зайнутдинов "Спартакқа" барудан бас тартты
Қазақстан ұлттық құрамасының және "Бешікташтың" жартылай қорғаушысы Бақтиер Зайнутдинов Ресейдің аты аңызға айналған "Спартак" (Мәскеу) клубына ауысудан бас тартқаны белгілі болды.
Бақтиер “Спартактың” ұсынысын қарастырмайды
Бұл туралы ресейлік инсайдер Иван Карповтың Telegram-арнасына сілтеме жасап хабарлады.
“Зайнутдинов “Спартактан” түскен ұсыныстарды қабылдамайды. Бұл туралы маған футболшының агенті — Новиков айтты. Сондықтан “Баха Тушинода” деген алып-қашпа сөздерге сенудің қажеті жоқ”, — деп жазды инсайдер “Инсайды от Карпа” арнасында.
Бұған дейін не айтылды?
Бұған дейін қазақстандық және ресейлік бірқатар БАҚ-та Бақтиер Зайнутдинов пен “Спартак” арасында келіссөздер жүріп жатқаны туралы мәліметтер тараған болатын. Кейбір ақпарат көздері мүмкін болатын трансфер құны ретінде 3 миллион еуро көлемінде сома атаса, кейбірі футболшының шешімі әлі нақтыланбағанын жеткізген.
Алайда Бақтиердің агенті бұл қауесеттерді ресми түрде жоққа шығарды.