Доннарумма мансабын АПЛ-да жалғастыратын болды
Италия құрамасының қақпашысы ағылшын біріншілігіне 39 миллион еуроға ауысты.
Италиялық қақпашы Джанлуиджи Доннарумма енді мансабын Англия Премьер-лигасында жалғастырады. Танымал инсайдер-журналист Фабрицио Романоның мәліметінше, ол «Манчестер Сити» сапына қосылды.
Трансфер құны және келісімшарт
Келісімшарттың жалпы құны €39 млн болды. Бұған дейінгі ақпараттарға сәйкес, Доннарумма Англиядағы жаңа клубында бонуспен қоса жылына €15 млн-ға дейін жалақы алуы мүмкін.
Қақпашы мен «Сити» арасындағы келісім 2030 жылға дейін жасалған.
Өткен мансап жолы
Доннарумма 2021 жылы «Миланнан» еркін агент ретінде «ПСЖ»-ға ауысқан еді. Оның Франция чемпионымен келісімі келесі жылы аяқталатын, алайда қос тарап келісімді ұзартуға келіспеді.
Өткен маусымдағы статистика
Өткен маусымда итальяндық қақпашы барлық турнирде 47 матч өткізіп, соның 17-сінде қақпасын гол кіргізбеді.
Transfermarkt порталының дерегінше, қазір Доннарумманың нарықтық құны €40 млн шамасында.