Қазақстанның бес дүркін чемпионы басты матчта жеңіліске ұшырады
Павлодардың «Ертіс» ФК Бірінші лиганың 21-турында сырт алаңда «Каспийге» жеңіліп қалды. Кездесу 2:0 есебімен аяқталды.
Бірінші лиганың орталық ойыны
Ақтаулықтар сапында жеңіс голдарын Мирас Тұрлыбек пен Бақдәулет Көңлімқос соқты.
Бұл нәтижеден кейін «Каспий» көш басындағы орнын сақтап қалды. Ақтаулық клубтың еншісінде – 53 ұпай. Екінші орында – «Ертіс» (48 ұпай). Үшінші сатыда «Алтай» (44 ұпай) орналасқан.
«Ертістің» тарихы мен қазіргі мақсаты
Павлодардың атақты командасы ел біріншілігінде бес рет чемпион атанған. «Ертіс» 1993, 1997, 1999, 2002 және 2003 жылдары Қазақстан Премьер-лигасында топ жарған.
Алайда 2020 жылы қарыз салдарынан клуб Премьер-лигадан шығарылып, 2024 жылы екінші лигада ойнауға мәжбүр болды. Бір маусымнан кейін павлодарлықтар қайтадан бірінші лигаға көтерілді.
Қазір «Ертістің» басты мақсаты – ҚПЛ-2026 маусымына жолдама алу.