Ағылшынның «Манчестер Юнайтед» клубында бас бапкер Рубен Аморимнің болашағына қатысты жаңа қауесет өршіп тұр. Indykaila News дереккөзі клуб басшылығы португалиялық маманды жақын уақытта қызметінен босатуы мүмкін екенін жазған. Алайда бұл ақпаратқа қатысты клуб тарапынан ресми мәлімдеме жасалған жоқ.
Indykaila News келтірген клуб ішіндегі пікір ретінде «тактика деңгейі көңіл көншітпейді, қомақты қаржы құйылғаннан кейін нәтиже сұрау заңды, Аморим ұзаққа бармауы мүмкін» деген мазмұндағы сөздер тараған.
16 желтоқсанға қараған түні АПЛ-дің 16-туры аясында «Олд Траффордта» өткен «Манчестер Юнайтед» – «Борнмут» кездесуі 4:4 есебімен аяқталды. Ойын барысында алаң иелері үш рет алға шықса да, жеңісті ұстап тұра алмады.
Reuters дерегінше, осы нәтижеден кейін «Юнайтед» 16 турдан соң 26 ұпаймен 6-орында қалды.
Рубен Аморим «Манчестер Юнайтедке» 2024 жылғы 1 қарашада бас бапкер ретінде тағайындалып, Эрик тен Хагтың орнын басты.
2024/25 маусымында «Юнайтед» АПЛ-де 15-орынмен аяқтап, Еуропа лигасының финалында «Тоттенхэмге» 0:1 есебімен жол берген. Осы нәтижелердің салдарынан клуб 2025/26 маусымында еурокубоктарға қатыса алмады.
Қосымша атап өтсек, биыл Англия лигасы кубогында (EFL Cup) «Манчестер Юнайтед» төртінші дивизиондағы «Гримсби Тауннан» кейінгі кезеңге өте алмай қалғаны да жазылды.