Оның орнына басқа маман іздеуге көшкен.
Көкшетаулық «Оқжетпес» футбол клубы Қазақстан құрамасының бұрынғы капитаны Самат Смақовты бас бапкер қызметіне тағайындамайтын болды.
ASnews.kz ақпаратына сәйкес, «Оқжетпестің» директоры Мұрат Тлешев Смақовты бас бапкер ретінде тағайындау идеясына күмәнмен қараған. Ал басқа дереккөздер бұрынғы «Жетісу» бапкерінің өзі көкшетаулық клубтың ұсынысынан бас тартқанын айтады. Бұған оның басқа клубпен алдын ала келісімге келуі себеп болуы мүмкін. Бұған дейін Самат Смақовқа павлодарлық «Ертіс» клубының қызығушылық танытқаны туралы ақпарат тараған еді.
Қазіргі таңда «Оқжетпес» басшылығы болгариялық маман Николай Костовпен келісімшарт жасауға ниетті. Ол жақын арада «Ақтөбе» клубынан кетуі тиіс.
Айта кетейік, Мұрат Тлешев биылғы жылдың басында да Костовты «Оқжетпестің» бас бапкері ретінде тағайындауға тырысқан. Алайда сол кезде қазақстандық маман Андрей Ферапонтов қызметін сақтап қалған болатын.
Сонымен қатар Тлешев пен Костов бұған дейін 2018–2019 жылдары қарағандылық «Шахтер» клубында бірге жұмыс істегені белгілі.