Француз шабуылшысы Ла Лигадағы кезекті голын соқты.
Мадридтік «Реал» клубының шабуылшысы Килиан Мбаппе команда тарихындағы ең үздік көрсеткіштердің біріне қол жеткізді. Франциялық футболшы бір күнтізбелік жыл ішінде «Реал Мадрид» сапында 59 гол соғып, клубтың бұрынғы жұлдызы Криштиану Роналдудың аты аңызға айналған рекордын қайталады.
Ла Лиганың 17-турында өткен «Севильяға» қарсы кездесуде Мбаппе 86-минутта пенальтиден мергендік танытты. Осы гол оның 2025 жылы мадридтік клуб үшін соққан 59-шы добына айналды. Голдан кейін Мбаппе Криштиану Роналдудың әйгілі стилінде қуанып, жанкүйерлердің ерекше ықыласына бөленді.
Ойын жалпы мадридтіктердің басымдығымен өтті. Нәтижесінде «Реал Мадрид» қарсыласын 2:0 есебімен жеңіп, турнирлік кестедегі жағдайын жақсарта түсті. Ал Мбаппенің нәтижелі ойыны оның командадағы көшбасшы рөлін тағы бір мәрте дәлелдеді.