Көкшетаулық «Оқжетпес» футбол клубы жақын уақытта жекеменшік басқаруға берілуі мүмкін.
Бұл туралы ASnews.kz хабарлайды. Ақмола облысындағы ірі агрохолдингтердің бірі клубты сатып алып, оның басқаруын өз қолына алуды қарастырып отыр.
Қазіргі таңда агрохолдинг басшылығы мен Ақмола облысының билік өкілдері арасында келіссөздер жүргізілуде.
Айта кетейік, соңғы уақытта «Оқжетпес» қаржылық қиындықтарға тап болып, команданың бірқатар жетекші ойыншылары мен бапкерлік штабы басқа клубтарға ауысып кеткен.
Өткен маусымда көкшетаулық ұжым Қазақстан Премьер-лигасының турнирлік кестесінде сегізінші орынға тұрақтаған болатын.