Шымкенттің "Ордабасы" ФК бұрынғы президенті Бауыржан Әбдубаитовқа қатысты қылмыстық іс ақтамайтын негіздермен тоқтатылды.
Тергеу материалдарына сүйенсек, Әбдубаитов клуб президенті қызметін атқарған кезеңде футболшылармен көпмиллиондық келісімшарттарға қол қойған. Мәлімет бойынша ойыншыларға директорлар кеңесімен келісусіз қомақты бонус тағайындалған.
Сыбайлас жемқорлыққа қарсы қызметтің нұсқасына сәйкес, мұндай шешімдер 2,3 млрд теңге көлемінде бюджет қаржысының негізсіз жұмсалуына алып келген.
Тексеру барысында тағы бір жайт анықталғаны айтылады. Клубтың Конференциялар лигасына қатысуына бөлінген 1,2 млрд теңге мақсатты бағытта қолданылмаған. Ақпаратқа сай, ұйымдастыру шығындарының орнына қаражат салық берешегін өтеу мен футболшыларға үстемақы төлеуге жұмсалған.
Осы фактілер бойынша құқық қорғау органдары қызметтік өкілеттікті теріс пайдалану және бюджет қаражатын мақсатсыз пайдалану белгілерімен тағы бір қылмыстық іс тіркегені хабарланды. Яғни, тексеріс бір мезетте Қылмыстық кодекстің екі бабы аясында жүрген.
Бақылаушы орган тергеудің басталғанын жария мәлімдегеннен кейін жеті ай өткен соң, Бас прокуратура істің мәртебесіне қатысты ресми түсініктеме берген.
Ресми жауапта Шымкент қаласы бойынша Сыбайлас жемқорлыққа қарсы агенттік департаменті Әбдубаитовқа қатысты абайсыздық фактісі бойынша сотқа дейінгі тергеп-тексеру жүргізгені және соның қорытындысымен іс ақтамайтын негіздермен тоқтатылғаны айтылған. Бұл шешіммен Шымкент прокуратурасы келісім берген. Сондай-ақ ҚПК-нің 201-бабына сәйкес сотқа дейінгі өндірістің өзге деректері жария етілмейтіні көрсетілген.
Ақпаратқа сай, қылмыстық қудалау реабилитациясыз тоқтаған. Яғни, іс тоқтатылғанымен адам толық ақталмайды; ал қылмыстық жауапкершіліктен босатылғандықтан, жаза қолданылмайды.
Еске салайық, Бауыржан Әбдубаитов "Ордабасы" ФК президенті қызметіне 2022 жылдың ақпанында келген. Ал 2024 жылдың мамырында денсаулық жағдайын алға тартып, қызметінен кеткені хабарланған.