Қостанайдың "Тобылы" 27 жастағы қорғаушы Пап-Альюн Ндиайемен келісімшартты ұзарту жөнінде келісімге келді.
Пап-Альюн Ндиайе 2024 жылдың басында қостанайлық клуб сапына қосылған. Бұған дейін қорғаушы Еуропада тәжірибе жинап, Италия мен Австрия чемпионаттарында ойнады. "Болонья" және "Альтах" клубтарының намысын қорғаған.
Ндиайе "Тобылға" ауысқалы команданың қорғаныс жүйесінде маңызды рөл атқарып келеді. Қазір ол қостанайлықтар сапында барлық турнирде 55 матч өткізді. Бұл көрсеткіш оның негізгі құрамдағы орнын айқын дәлелдейді.
Қорғаушы клубтың соңғы трофейлік табыстарына да өз үлесін қосты. Ндиайемен бірге "Тобыл" Қазақстан Кубогын жеңіп алды, Қазақстан Суперкубогын иеленді.
Осы жетістіктер оның командадағы негізгі ойыншылардың бірі екенін тағы бір мәрте көрсетті.
Transfermarkt деректеріне сүйенсек, француз қорғаушысының нарықтағы қазіргі бағасы 500 мың еуро. Бұл шамамен 296,8 миллион теңге.
Еске салайық, өткен маусым қорытындысы бойынша "Тобыл" Қазақстан Кубогын жеңіп алды және чемпионатта үшінші орын иеленді.