"Қайраттың" Чемпиондар лигасындағы ықтимал қарсыласы анықталды
Қазақстан чемпионы екінші раундтан сәтті өтсе, Болгария немесе Румыния клубтарының бірімен кездеседі.
Үшінші раундта кіммен кездесуі мүмкін?
Рафаэль Оразбахтин жаттықтыратын команда екінші іріктеу кезеңінде Кипрдің “Омониясымен” күш сынасады. Осы жұптың жеңімпазы келесі кезеңде “Левски” мен “Университатя Крайова” арасындағы текетірестің үздігіне қарсы ойнайды.
Ол үшін алматылық клуб алдымен “Омониядан” басым түсуі керек.
“Омония” – “Қайрат” матчтары қашан өтеді?
Қос команданың алғашқы кездесуі 22 шілдеде Никосия қаласында өтеді. Ойын Қазақстан уақытымен сағат 22:00-де басталады.
Қарымта матч 29 шілдеде Алматыда ұйымдастырылады. Екі кездесудің қорытындысы бойынша келесі кезеңге жолдама алған команда анықталады.
Алматылық ұжым Чемпиондар лигасының іріктеу бәсекесін Черногорияның “Сутьеска” клубына қарсы бастады.
“Қайрат” екі матчтың нәтижесі бойынша қарсыласын жарыстан шығарып, екінші квалификациялық раундқа жолдама алды. Енді команда Чемпиондар лигасының негізгі кезеңіне шығу үшін күресін жалғастырады.