Маскерано енді Мессиді жаттықтырады

Америкалық Интер Майами клубы Хавьер Маскераноны бас бапкер етіп тағайындады. Аргентиналық маманмен келісімшарт 2027 жылғы маусым аяқталғанға дейін жалғасады. 

Бұған дейін ол Аргентинаның  U-20 құрамасын баптады. 

Айта кетейік, 40 жастағы Маскерано ойыншы ретіндегі мансабында Ривер Плейт, Коринтианс, Вест Хэм, Ливерпуль, Барселона және қытайлық Хэбэй Чайна Форчун командалары сапында өнер көрсетті. 

Каталондық клубпен 2 мәрте Чемпиондар лигасын жеңіп алды. Ал Аргентина құрамасымен екі дүркін Олимпиада чемпионы атанды. Сонымен қатар, 2014 жылғы әлем біріншілігінің күміс жүлдегері.