Түркия Суперлигасы Моуриньоға қатаң жаза тағайындады
"Фенербахче" бас бапкері Жозе Моуринью Стамбул дербиінен кейін төрт матчқа дисквалификацияға ұшырады. Бұл туралы Түркия футбол федерациясының (TFF) ресми сайты хабарлады.
Түркия Суперлигасының 25-турындағы "Галатасарай" – "Фенербахче" кездесуі 25 ақпан күні 0:0 есебімен аяқталған. Бірақ матчтан кейін Моуриньоның айтқан сөздері үлкен дауға айналды.
Португалиялық бапкер "Галатасарай" ойыншыларының қосалқы құрамындағылардың өзін әдепсіз ұстағанын атап, оларды "маймыл сияқты секірді" деп сипаттады. Сонымен қатар ол судьялар бөлмесіне кіріп, бас төреші словениялық Славко Винчичке алғыс айтып, егер матчты түрік төрешісі басқарғанда бұл нағыз апат болар еді деген пікір білдірді.
"Галатасарай" клубы Моуриньоның бұл мәлімдемесін нәсілшілдік және қарсыластарды қорлау деп бағалап, УЕФА мен ФИФА-ға ресми шағым түсіретінін мәлімдеді.
TFF-тің қатаң шешімі
Түркия футбол федерациясының дисциплинарлық комитеті Жозе Моуриньюға:
- Қарсыластарын қорлағаны үшін – 2 матчтық дисквалификация
- Түрік төрешілерін ашық сынап, ел футболының беделіне нұқсан келтіргені үшін – тағы 2 матчтық дисквалификация берді.
- Сонымен қатар, португалиялық маманға 1,6 миллион түрік лирасынан (38 мың еуродан астам) айыппұл салынды.
"Галатасарай" УЕФА мен ФИФА-ға жүгінеді
"Галатасарай" клубы Моуриньюның мәлімдемесіне қатысты халықаралық футбол ұйымдарына ресми шағым түсіруді жоспарлап отыр. Егер УЕФА мен ФИФА істі қарастырып, шешім шығарса, Моуриньоға одан да қатаң жаза қолданылуы мүмкін.
Қазір "Фенербахче" басшылығы бұл шешімге қарсы шағымданатынын немесе қабылдайтынын ресми түрде жариялаған жоқ.
Моуриньомен "Фенербахче" енді не істейді?
Төрт матчтық дисквалификация "Фенербахче" үшін маңызды кезеңде үлкен соққы болғалы тұр. Бапкерсіз қалған команда чемпиондық бәсекеде басты қарсыласы "Галатасараймен" күресуді жалғастыра ала ма?