Елде көкпар мен асық ату трендке айналды!

Соңғы жылдары Қазақстанда ұлттық спорт түрлеріне деген сұраныс айтарлықтай артқан. 2024 жылдың қорытындысы бойынша, елімізде 660 мыңнан астам адам ұлттық спортпен тұрақты түрде айналысып жүр. Яғни халықтың 9,6 пайызы. Бұл туралы sportarena.kz хабарлады. 

Салыстыру үшін айта кетсек, 2023 жылы бұл көрсеткіш 619,2 мың адам (8,7%) болған.

Ұлттық спорттың даму динамикасы (2018–2024):

• 2018 жыл: 375 926 адам
• 2019 жыл: 399 357 адам
• 2022 жыл: 432 457 адам
• 2023 жыл: 619 200 адам
• 2024 жыл: 660 000-нан астам

Бұл – соңғы алты жылда 75%-дан астам өсім деген сөз.

Ең танымал ұлттық спорт түрлері

Қазақстандықтар арасында кең тараған және жиі қатысатын ұлттық спорт түрлерінің қатарына мыналар кіреді:

• Қазақ күресі
• Тоғызқұмалақ
• Асық ату
• Көкпар
• Бәйге
• Теңге ілу
• Жамбы ату
• Аударыспақ
• Құсбегілік
• Дәстүрлі садақ ату
• Жекпе-жек және басқалар

Ұлттық спортты дамытуға арналған инфрақұрылым

Қазіргі таңда елдің әр өңірінде 15 балалар мен жасөспірімдерге арналған спорт мектебі және 17 ұлттық спортқа маманданған клуб жұмыс істейді. Бұл мекемелер ауыл-аймақтардағы дарынды жастарды тәрбиелеуде үлкен рөл атқаруда.

Сонымен қатар, Қазақстанда жыл сайын 1000-нан астам ұлттық спорт сайысы өткізіледі, бұл өз кезегінде дәстүр мен мәдениетті жаңғыртудың маңызды алаңына айналып отыр.