Қатар ҰОК вице-президенті Мұхаммед Юсуф әл-Мана Қазақстан ҰОК штаб-пәтеріне келді
Қатар Ұлттық Олимпиадалық комитетінің вице-президенті, Азия ауыр атлетика федерациясының басшысы Мұхаммед Юсуф әл-Мана іссапарымен Қазақстан Ұлттық Олимпиадалық комитетінің штаб-пәтеріне келді.
Қазақстан Ұлттық Олимпиадалық комитетінің бас хатшысы Әлімжан Ақаев Мұхаммед Юсуф әл-Мананы Қатар ҰОК вице-президенті болып сайлануымен құттықтады.
Тараптар Қазақстан мен Қатар Ұлттық Олимпиадалық комитеттері арасындағы ынтымақтастықтың болашағын талқылады.
Кездесу барысында халықаралық ірі спорттық іс-шараларға дайындық, спорт саласындағы тәжірибе алмасу, бірлескен жобаларды іске асыру және Олимпиада қозғалысын дамыту мәселелеріне ерекше назар аударылды.
Бұл кездесу екі ел арасындағы өзара әрекетті нығайтудағы маңызды қадамға айналып, болашақтағы ынтымақтастықтың жаңа мүмкіндіктерін ашты.
Айта кетейік, бұған дейін Мұхаммед Юсуф әл-Мананы Ақордада Қазақстан Президенті Қасым-Жомарт Тоқаев қабылдаған болатын. Мемлекет басшысы құрметті қонаққа ауыр атлетиканы дамытуға қосқан үлесі үшін II дәрежелі “Достық” орденін табыстады.