Қазақстандық боксшы қыз Жұмағұловтың «үшінші әйел аламын» деген сөзіне жауап берді
Аида Сатыбалдинова MMA файтері Жалғас Жұмағұловтың үшінші әйел алғысы келетінін айтқан мәлімдемесіне қатысты пікір білдірді.
Жұмағұлов не деді?
БАҚ-қа берген сұхбаттарының бірінде аралас жекпе-жек өкілі Жалғас Жұмағұлов отбасылық өмірге қатысты жоспарын айтып, «үшінші әйел аламын» деген ойын айтқан.
Аида Сатыбалдинова бұл сөзге әлеуметтік желіде ашық реакция танытты. Оның айтуынша, мұндай мәлімдемені мақтан ету түсініксіз.
«Мына мақтанудың мәнін түсінбедім. Екі әйелің, жеті балаң бар екен — жарайды. Бірақ Қазақстан — зайырлы мемлекет, бізде көп әйел алушылыққа тыйым салынғанын да ұмытпа!»
Сатыбалдинова туралы қысқаша мәлімет
Аида Сатыбалдинова бірнеше жыл бойы АҚШ-та тұрады. 38 жастағы қазақстандық боксшы WBF International нұсқасы бойынша әлем чемпионы атанған. Boxrec порталындағы дерекке сәйкес, ол 2022 жылдан бері жекпе-жек өткізбеген.
Ал Жалғас Жұмағұлов Чехиядағы Oktagon лигасында ең жеңіл салмақтағы қолданыстағы чемпион саналады.
Ол алдағы демалыс күндері титулын қорғайды. Чемпиондық белбеу үшін Дэвид Дворакқа қарсы жекпе-жек өткізеді.