WTA тур атауын өзгертеді. Mercedes-Benz-пен көпжылдық келісім жасалды

2026 жылдан бастап жаңа атау енгізіледі

WTA баспасөз қызметінің ақпаратынша, 2026 жылғы 1 қаңтардан бастап әйелдер туры WTA Tour Driven by Mercedes-Benz деп аталады.

Жаңа келісім аясында Mercedes-Benz:

• WTA-ның бас серіктесі болады;
• ұйымның эксклюзивті автокөлік серіктесі мәртебесін алады;
• WTA 1000, 500 және 250 санатындағы турнирлерде бренд ретінде ұсынылады.

Қаржылық шарттар әзірге жарияланған жоқ.

Билли Джин Кинг: «Бұл теннистен де кең сигнал»

WTA негізін қалаушы, АҚШ-тың бұрынғы теннисшісі Билли Джин Кинг серіктестіктің маңызын ерекше атап өтті.

«Mercedes-Benz сияқты жаһандық брендтің қолдауы теннистен әлдеқайда кең мағына береді. Бұл әйелдер спорты маңызды екенін және спортшыларымыздың көрініп, дауысы естіліп, өзін таныту мен шабыт сыйлау үшін жаһандық платформаға лайық екенін көрсетеді. WTA-ның осы көзқарасты табандылықпен әрі құлшыныспен ілгерілетіп жатқанына ерекше мақтанамын», — деді ол.

Айта кетейік, 2022 жылдан бері WTA-ның титулдық серіктесі медициналық құрылғылар мен диагностикалық құралдар өндіретін Hologic компаниясы болған. Бұрынғы келісім бойынша компания WTA-ға жылына 18–20 млн доллар көлемінде төлем жасап отырған.