Ресей боксының жарық жұлдыздарының бірі, екі дүркін ел чемпионы, "Сібірлік Тайсон" лақап атымен танымал Сергей Башкиров 54 жасында қайтыс болды.
Новосибирсктегі "Крепость" кәсіпқой бокс клубы өзінің VK желісіндегі ресми парақшасында қайғылы жаңалықты растады. Спортшы 4 шілде күні көз жұмды.
Сергей Башкировқа омыртқа жотасының ісігі диагнозы қойылып, екі мәрте операция жасалған. Бұдан бөлек 24 рет радиотерапиялық ем жүргізілді. Өкінішке қарай спорт ардагерінің ағзасы мұндай ауыр сынаққа төтеп бере алмады.
Башкиров — КСРО-ның спорт шебері, сондай-ақ КСРО Қарулы күштері арасындағы чемпионаттың күміс жүлдегері. 2001 жылы ол IBF (International Boxing Federation) тұжырымы бойынша интерконтиненталдық әлем чемпионы атағына ие болды.
Сергей кәсіпқой рингте 19 кездесу өткізіп, соның 14-інде жеңіске жеткен.
Спорт жанкүйерлері мен жақындары сүйікті боксшымен 8 шілде күні Новосибирскте қоштасады.