Қазақстандық танымал боксшы, Париж-2024 Олимпиадасының қатысушысы Мұхамедсабыр Базарбайұлы Қазақстан чемпионатының финалынан қағылды.
70 кг салмақ дәрежесінде жартылай финалға шыққан Түркістан облысының өкілі Базарбайұлы алматылық Фарух Тоқтасыновпен кездесті. Қатаң және тартысты өткен жекпе-жекте төрешілердің шешімімен Мұхамедсабыр 2:3 есебімен жеңіліп, жарысты тоқтатты.
Осылайша Олимпиада қатысушысы ел біріншілігінің қола жүлдегері атанды. Бұл нәтиже жанкүйерлер үшін күтпеген жағдай болды. Көптеген спорт сарапшылары Базарбайұлының финалға дейін жететініне сенімді болған.
Алматылық Фарух Тоқтасынов алтын медаль үшін Қарағанды облысының өкілі Абылайхан Жүсіповпен жұдырықтасады. Жүсіпов те ұлттық құраманың тәжірибелі боксшыларының бірі саналады.