Орта салмақтағы WBO және IBF әлем чемпионы Жәнібек Әлімханұлы (17-0, 12 KO) алдағы шешуші жекпе-жек алдында батыл мәлімдеме жасады. Қазақ боксшысы ешкімнен қашпайтынын, керісінше қарсыластарын өзі қуып жүргенін айтты.
Қазақ боксының көшбасшысы Жәнібек Әлімханұлы әлеуметтік желідегі Х (бұрынғы Twitter) парақшасында алдағы жекпе-жек қарсаңында жанкүйерлерге арнап мәлімдеме жасады. Бұл туралы sportinside.kz хабарлады.
«Мен чемпион атанған күннен бастап, барлық белбеулерді біріктіру үшін бар күшімді салып келемін. Ешбір чемпионнан қашпадым, керісінше — мен оларды қуып келемін! Қазір менің екі белбеуім бар, енді тағы екеуі керек», — деп жазды ол.
Бұл мәлімдеме бокс әлемінде үлкен резонанс тудырды. Көпшілік оның батылдығын және «қазақ стилінің» рухын жоғары бағалады.
Жәнібек Әлімханұлының келесі айқасы 6 желтоқсан күні өтеді. Ол WBA тұжырымы бойынша әлем чемпионы кубалық Эрисланди Ларамен (31-3-3, 19 KO) жұдырықтасады.
Жекпе-жек АҚШ-тың Техас штаты, Сан-Антонио қаласында өтеді және бұл кездесу үш белбеу үшін өтетін біріктіру айқасы болмақ.
Қазір Жәнібек өзінде бар WBO және IBF белбеулерін қорғап қана қоймай, WBA белдігін де иеленуге ұмтылуда. Бұл жеңіс оны орта салмақтағы ең беделді чемпиондардың бірі етеді.
Әлімханұлы соңғы жылдары орта салмақтағы ең тұрақты және мықты чемпиондардың қатарына кірді. Оның 17 жекпе-жекте бірде-бір жеңіліссіз, соның 12-сін нокаутпен аяқтауы – кәсіби шеберліктің дәлелі.
Еске сала кетейік, биыл көктемде Астанада өткен соңғы жекпе-жегінде ол француз Анауэль Нгамиссенгені бесінші раундта нокаутқа жіберген еді. Сол кездегі айқас оның «Қазақ стилі» философиясын айқын көрсетті — мінез, техника және дәлдік.