Боксшының ойынша жекпе-жек тек төрешілер шешімімен анықталады.
IBF тұжырымы бойынша бірінші орта салмақтағы әлем чемпионы Бахрам Муртазалиев 6 желтоқсанда АҚШ-та өтетін Жәнібек Әлімханұлы мен Эрисланди Лараның кездесуіне болжам жасады.
Орта салмақтағы бұл айқаста үш бірдей белбеу сарапқа салынады.
«Жәнібек пен Лараның жекпе-жегі қалай өтетінін нақты айту қиын. Егер Жәнібек шабуылға шықса, өте қызықты айқас болады. Лара әдетте қарсыласының қимылына қарап жұмыс істейді, Жәнібек те солай. Ал егер Жәнібек өзі бірінші нөмірмен бокстасса, онда көрермен үшін қызықты жекпе-жек болмақ. Егер айқас тактикалық тұрғыда өтсе, онда Жәнібек ұпай санымен жеңіске жетеді», - деді Бахрам Муртазалиев.
Айта кетейік, Жәнібек Әлімханұлы - орта салмақта WBO және IBF нұсқалары бойынша әлем чемпионы, ал оның қарсыласы Эрисланди Лара - WBA белбеуінің иегері. Тағы бір белбеу – WBC – Карлос Адаместің белінде.