Қазақстандық кәсіпқой боксшы өз жеңісіне сенімді екенін айтты.
Орта салмақта WBO және IBF нұсқалары бойынша әлем чемпионы Жәнібек Әлімханұлы (17-0, 12 KO) келесі айда өтетін WBA белбеуінің иегері Эрисланди Ларамен (31-3-3, 19 KO) жекпе-жектен жеңіспен шығатынына сенімді.
Әлімханұлы мен Лара үш чемпиондық атақ үшін 6 желтоқсанда АҚШ-тың Техас штаты, Сан-Антонио қаласында жұдырықтасады. Қазақстан уақытымен бұл кездесу 7 желтоқсан таңында өтеді.
«6 желтоқсан — мен әлем чемпионы атағының үшінші белбеуін иеленемін!», — деп жазды Әлімханұлы Х әлеуметтік желісінде, жаттығу лагерінен бірнеше суретпен бөлісіп.
Айта кетейік, бұған дейін Жәнібек Әлімханұлы осы салмақтағы төрт белбеудің барлығын біріктіруді жоспарлап жүргенін мәлімдеген еді. Қазір жетіспей тұрған WBC нұсқасы бойынша чемпиондық белбеудің иегері — доминикандық Карлос Адамес (15-1, 10 KO).