АҚШ-тың Лас-Вегас қаласында өткен UFC Fight Night турнирінде ресейлік файтер, «кунг-фу патшасы» атанған Муслим Салихов ауыр жеңіліске ұшырады. Оны сербиялық файтер Урош Медич бар болғаны 63-секундта нокаутқа жіберді,
Жекпе-жек UFC Apex аренасында, жартылай орта салмақ (77,1 кг) санатында өтті. Айта кетсек, бұл салмақ дәрежесінде қазақстандық Шавкат Рахмонов әлемдік рейтингтің үшінші нөмірі болып табылады.
Жекпе-жек үш раундқа жоспарланғанымен, бірінші раундта-ақ аяқталды. Медич бастапқы шабуылдардың бірінде қарсыласын дәл соққымен сілкіндіріп, нокдаунға түсірді. Ресейлік файтер қорғаныссыз қалған сәтте рефери жекпе-жекті тоқтатты — уақыт 1 минут 03 секунд.
Бұл жеңіс Урош Медичтің UFC-дегі екінші қатарынан жеңісі болды. Қазір оның кәсіби рекорды — 12 жеңіс және 3 жеңіліс, ал ерекше жайт — барлық 15 жекпе-жегі де мерзімінен бұрын аяқталған.
41 жастағы Муслим Салихов осыған дейінгі үш жеңісті сериясын тоқтатты. Енді оның рекорды — 22 жеңіс пен 6 жеңіліс. Салихов ММА жанкүйерлеріне өзінің кунг-фу стиліндегі техникасымен және ерекше ұрысу мәнерімен танымал.