Өзбекстан бокс федерациясы Челябіде (Ресей) өткен кәсіпқой бокс кешінде қазақстандық боксшы Айдос Тастаев пен өзбек Олимпиада чемпионы Асадхужа Муйдинхужаев арасындағы жекпе-жек қорытындысына қатысты ресми жазба жариялады.
Кәсіпқой бокс кеші аясындағы кездесу айтарлықтай ұзаққа созылған жоқ. Айдос Тастаев пен Өзбекстанның атақты боксшысы Асадхужа Муйдинхуджаев арасындағы айқас жартылай орта салмақтағы жекпе-жектер кешінде өтті. Кездесу екінші раундта техникалық нокаутпен өзбек боксшысының пайдасына аяқталды.
Бұл Муйдинхуджаев үшін кәсіпқой бокстағы дебюттік жекпе-жек болды. Ол алғашқы профи айқасында-ақ қазақстандық қарсыласын уақытынан бұрын жеңіп, кәсіби мансабын жарқын бастады.
Өзбекстан бокс федерациясының баспасөз қызметі жекпе-жек жайлы ақпаратты өздерінің ресми парақшаларында бөлісті. Мәлімдемеде былай делінген:
«Асадхуджа Муйдинхуджаев қарсыласын мерзімінен бұрын жеңді. Кәсіпқой бокстың бүгінгі кешіндегі жекпе-жектердің бірінде Асадхуджа Муйдинхуджаев қазақстандық Айдос Тастаевты екінші раундта-ақ ұтып, айқын басымдықпен жеңіске жетті».
Осылайша өзбек тарапы Олимпиада чемпионының профи рингтегі алғашқы қадамын сәтті болғанын атап өтті.