Жәнібек Әлімханұлының допинг дауына қатысты пікір айтылды.
Қытай халық университетінің доценті және Политехникалық мектептің ғылым докторы Фабьен Гаргам IBF/WBO нұсқалары бойынша әлем чемпионы, қазақстандық Жәнібек Әлімханұлының В сынамасының ашылуына қатысты пікір білдірді.
«Мұндай жағдайдың ықтималдығы өте төмен, әсіресе мельдонийге қатысты. Егер В сынамасының нәтижесі теріс болып шықса, онда А сынамасының алғашқы қорытындысының дәлдігі күмән тудырады», – деп жазды доктор X әлеуметтік желісінде.
Айта кетейік, желтоқсан айында Әлімханұлының допинг-сынамасы оның ағзасында тыйым салынған заттың бар екенін көрсеткен болатын. Осыдан кейін оның WBA чемпионы, кубалық Эрисланди Лараға қарсы жекпе-жегі тоқтатылды. Кейінірек боксшының командасы В сынамасын ашуды сұратқан еді. Бүгін Қазақстанның кәсіби бокс федерациясының президенті Рахимжан Ерденбеков В сынамасының ашылғанын хабарлады. Алайда талдау нәтижелері әзірге жарияланған жоқ.