Өзбекстанның екі дүркін Олимпиада чемпионы BoxRec рейтингінен шығарылды
Кәсіпқой бокста жеңіліп көрмеген Хасанбой Дусматов BoxRec статистикалық порталының рейтингінен алынып тасталды.
BoxRec рейтингінен неге шығарылды?
BoxRec ережесіне сәйкес кәсіпқой бокста 12 айдан астам жекпе-жек өткізбеген боксшы рейтингтен шығарылады.
Хасанбой Дусматовтың соңғы кәсіпқой кездесуі 2025 жылдың 20 шілдесінде Бішкекте өткен. Сол кеште филиппиндік Марк Антонионы төрешілердің бірауыздан шығарған шешімімен жеңіске жетті.
Дусматов 2025 жылдың қазан айында тағы да Бішкектегі бокс кешінде мексикалық Калистомен кездесуге тиіс болған. Бірақ өзі белгіленген салмақ лимитіне сәйкес келе алмады. Сонымен қатар денсаулығына байланысты қиындықтар туындағандықтан жекпе-жек өткізілмеді.
Ал 2026 жылдың сәуірінде Қырғызстан астанасында пуэрториколық Джонатан Гонсалеспен титулдық кездесу ұйымдастыру жоспарланған. Боксшылар WBA тұжырымы бойынша аса жеңіл салмақтағы уақытша әлем чемпионы атағына таласуы керек еді. Дегенмен ұйымдастырушылардың кесірінен бокс кеші өтпей қалды.
Әуесқой бокста әлем чемпионы атанды
Бір жылдан астам уақыт кәсіпқой рингке шықпағанына қарамастан Хасанбой Дусматовтың спорттық мансабында толық үзіліс болған жоқ.
Ол 2025 жылдың желтоқсанында IBA ұйымының қолдауымен өткен әлем чемпионатына қатысты. Алтын медаль жеңіп, әуесқой бокстан екі дүркін әлем чемпионы атанды.
Дусматов бұған дейін Олимпиада ойындарында да екі рет чемпиондық тұғырға көтерілген. Кәсіпқой бокста жеңілістің ащы дәмін татқан емес.