"Чемпиондар да құлайды". Қазақстандық боксшы Джервонта Дэвиспен жұдырықтасуға қатысты мәлімдеме жасады
Сұлтан Заурбек әйгілі америкалық боксшымен кездесуге қатысты пікір білдірді
Қазақстандық кәсіпқой боксшы Сұлтан Заурбек америкалық Джервонта Дэвиспен жекпе-жек өткізу мүмкіндігі туралы ойын ортаға салды.
IBF және болашақ жекпе-жек жайлы пікір
«IBF өз жұмысын өте жақсы атқарады. Егер боксшы айқын үміткер болса, оған міндетті түрде жекпе-жек ұйымдастырылады. Рейтингте менен жоғары тұрған Соарес уақытша чемпиондық белбеу үшін жекпе-жек өткізуге ниетті, бірақ әзірге нақты шешім жоқ. Барлығы менің Джервонта Дэвиспен жекпе-жегімді күтіп отыр, алайда ол менен екі салмақ дәрежесіне жоғары өнер көрсетеді. Мен өз салмағымда екі чемпионмен кездескенмін, сондықтан бұл кездесудің болуы мүмкін екені туралы әңгімелер тарады», – деді Заурбек.
Сұлтан Заурбек сондай-ақ, қарсыластың әлеуеті мен өзінің қарым-қабілеті жайлы да сөз қозғады.
«Ол да адам, оның да екі қолы мен екі аяғы бар. Әрине, ол мықты нокаутер, еңбексүйгіш боксшы. Бірақ жеңілмеген чемпиондар да құлайды. Сол себепті мен бұл жекпе-жекке дайынмын», – деп сенімді түрде жауап берді қазақстандық спортшы.