Баходир Джалолов Қазақстанда жекпе-жек өткізетінін жариялады
Кәсіпқой бокста суперауыр салмақта жеңілмеген өзбекстандық Баходир Джалолов (14-0, 14 КО) келесі жекпе-жегін Қазақстанда өткізеді.
Баходир Джалолов 5 сәуір күні Астанада өтетін "Батырлар шайқасы" бокс кешінде шаршы алаңға шығады. Турнирдің басты жекпе-жегі орта салмақтағы WBO/IBF әлем чемпионы Жәнібек Әлімханұлы мен француз Анауэль Нгамиссенге арасындағы кездесу болмақ. Джалоловтың қарсыласы әлі жарияланған жоқ.
"5 сәуір. Астана. Жақында кездесеміз, Қазақстан", – деп жазды "Үлкен өзбек" өзінің Instagram парақшасында жекпе-жек афишасымен бөлісе отырып.
Бұл жекпе-жек Баходир Джалолов үшін 2023 жылдың қараша айынан бергі алғашқы кәсіпқой кездесуі болмақ.
Ол ақпан айында Канадада жекпе-жек өткізуі тиіс еді, алайда медициналық комиссия денсаулығына байланысты оны рингке жібермеген.