Грек-рим күресінен Қазақстан құрамасы Азия чемпионатында тағы да сәтсіздікке ұшырады
Иордания астанасы Амманда өтіп жатқан 2025 жылғы Азия чемпионатында Қазақстанның ерлер құрамасы грек-рим күресінен тағы да ауыр жеңіліске ұшырады. Бұл — бір күн ішінде тіркелген қатарынан төртінші сәтсіз нәтиже.
Шымкент тумасы Ілияс Гучигов 97 келіге дейінгі салмақ дәрежесінде жарыс жолына шыққан болатын. Алайда алғашқы белдесуінде-ақ үндістандық Нитештен 0:9 есебімен ойсырай ұтылып, жартылай финалға жолдама ала алмады.
Айта кету керек, Нитеш — былтырғы U23 Азия чемпионатының финалисі.
Гучиговтың алдында үш отандасымыз да жарыстан ерте шығып қалған Олар: Бақытжан Қабдұл, Әділхан Сатаев және Мейіржан Шермаханбет. Бәрі де алғашқы белдесулерінде-ақ қарсыластарына есе жіберді.
Бұл нәтижелер Қазақстан құрамасының қазіргі ахуалын көрсетіп тұр. Азия құрлығындағы бәсеке күшейіп, әрбір жеңіс бұрынғыдан да қиынға түсуде.