Естеріңізде болса, тамыз айында америкалық әнші «Астана Аренада» концерт береді.
1 тамыз күні «Астана Аренада» америкалық супержұлдыз Дженнифер Лопестің концерті өтетіні бұған дейін хабарланған болатын. Осыған байланысты елордалық «Астана» футбол клубы ресми мәлімдеме жасап, жанкүйерлер мен БАҚ өкілдеріне өз ұстанымын жеткізді.
Клуб таратқан ақпаратқа сәйкес, концерт ұйымдастырушылары «Астана» клубымен байланысқа шығып, стадионды дайындау және сахнаны құру жұмыстарына алты күн уақыт қажет болатынын нақтылаған. Сонымен қатар, бұл жолы алаң төсенішін (газонды) кез келген сыртқы әсерден қорғау үшін заманауи қорғаныш жамылғысы алғаш рет қолданылмақ.
«Астана» басшылығы Конференциялар лигасының екінші іріктеу кезеңіндегі матчты 24 шілдеде өз алаңында өткізу үшін УЕФА және қарсылас команда өкілдерімен келіссөздер жүргізіп жатыр. Бұл, клубтың пікірінше, «Астана Аренада» өтетін халықаралық концерт пен маңызды футбол кездесуін тиімді ұйымдастыруға жол ашады.
Стадион жөндеу жұмыстарынан кейін еуропалық стандарттарға сай келетін, заманауи көпфункционалды спорт нысанына айналды. Енді мұнда тек футбол матчтары ғана емес, әлемдік деңгейдегі шоу-концерттер де өткізуге мүмкіндік бар. Клуб мәлімдемесінде бұл бағыттың Астананың халықаралық деңгейде танылуына оң әсер ететіні атап өтілген.
«Біздің мақсатымыз – елорданы халықаралық деңгейде насихаттау. Осы ретте Дженнифер Лопестің концертіне ешқандай қарсылығымыз жоқ», – делінген ресми хабарламада.
Клуб басшылығы барлық жанкүйерге қолдау үшін алғысын білдіріп, «Астана Аренада» өтетін әр іс-шараны ел есінде қалатын ерекше оқиғаға айналдыруға уәде берді.
