Бакуде өткен халықаралық "Жібек жолы" турнирінде ерлер арасындағы финалдық жекпе-жектер аяқталды. Қазақстан намысын қорғаған үш боксшының екеуі алтын медаль иеленіп, бірі күміспен шектелді.
Бағлан Кенжебек — Ресейлік қарсыласын тізе бүктірді
54 келі салмақ дәрежесінде ел намысын қорғаған Бағлан Кенжебек финалда Ресей боксшысы Максим Кузнецовпен жұдырықтасты. Тартысты өткен жекпе-жекте төрешілердің шешімімен Кенжебек 4:1 есебімен жеңіске жетті. Бұл – Қазақстан үшін алғашқы алтын.
Нұрбек Мұрсал — сенімді жеңіс
71 келіде рингке көтерілген Нұрбек Мұрсал финалда тағы бір ресейлік боксшы — Игорь Свиридченковтан басым түсті. Жекпе-жек барысында Мұрсал толық үстемдік көрсетіп, 5:0 есебімен таза жеңіске жетті. Бұл жеңіс Қазақстан құрамасының екінші алтыны болды.
Санжаралы Бегалиев — финалда сүрінді
75 келі салмақта өнер көрсеткен Санжаралы Бегалиев финалда жергілікті боксшы Саиджамшид Джафаровпен күш сынасты. Әзербайжандық спортшы төрешілердің бірауыздан қабылдаған шешімімен жеңіске жетті — 0:5. Осылайша Бегалиев күміс жүлдемен шектелді.
