Қазақстандық бірінші жартылай орта салмақтағы кәсіпқой боксшы Батыр Жүкембаев (23-1, 17 KO) Астанада өтетін кезекті жекпе-жегінің алдында жағымды жаңалық алды – Asianboxing.info сайты оны британдық Қейн Гарднерге (17-4, 7 KO) қарсы жекпе-жектің айқын фавориті деп атады.
Asian Boxing порталының жазуынша, бұл жеңіс Жүкембаевты әлем чемпионы атағы үшін күреске бір қадам жақындатады:
“2021 жылы Батырды Субриэль Матиас жеңген болатын. Содан бері ол қатарынан бес жеңіске қол жеткізді. Егер бұл жеңісті сериясын жалғастырса, титулдық жекпе-жекке жол ашылады. Бұл жолы одан жеңісті оңай алуы күтілуде”, — делінген жарияланған материалда.
Астана төрінде 5 сәуір күні өтетін бокс кешінде Батыр Жүкембаев — Кейн Гарднер жекпе-жегі негізгі оқиғалардың бірі болады. Сонымен қатар кештің басты кездесуі ретінде орта салмақтағы Жәнібек Әлімханұлы мен франциялық Анауэль Нгамиссенге арасындағы титулдық айқас өтеді.
