Такси талабы күшейеді
Қазақстанда жеке тасымалдаушыларды күнделікті медициналық куәландыру және техникалық бақылаудан өтуге қатысты жаңа талаптар күшіне енеді.
Заңбұзушылықтардың алдын алуға арналған ведомствоаралық комиссияның отырысында жеке тасымалдаушылардың күнделікті медициналық куәландырудан және техникалық бақылаудан өтуіне қатысты ерекше мән берілді. Премьер-министр Олжас Бектенов жаңа нормалардың жүзеге асуы қалай бақыланатынын көлік министрі Марат Қарабаевтан сұрады:
“Рейске шығар алдында көлікті қарап шығып, суретке түсіріп ортақ базаға жөнелтеді. Тек содан кейін рұқсат алады. Ал рейс қарсаңындағы медициналық бақылауға келер болсақ, ол да онлайн түрінде жүзеге асырылады. Сапарға шығар алдында автопаркте куәландырудан өтеді. Ол үшін арнайы жабдық сатып алынып жатыр. Қазір ол жеткіліксіз. Мұндай жабдықтар жанармай құю бекеттерінде қосымша орнатылады. Аталған механизмдер интернет-агрегаторлар үшін қарастырылады”, – деді баяндамасында Марат Қарабаев.