Тәліптер шахматты харам деп таныды
Ауғанстанда шахмат ойынына ресми түрде тыйым салынды. Бұл шешімді Талибан қозғалысының Ізгілікке үндеу және бұзақылықтың алдын алу министрлігі қабылдады.
Шахмат — харам: федерация жабылды
Министрлік шахматты "ислам нормаларына қайшы" деп жариялап, елдегі Ауғанстан шахмат федерациясының жұмысын тоқтатты. Бұрынғы атқарушы директор Абасин Мохибидің айтуынша, Талибан билікке келген сәттен бастап бірде-бір шахмат турнирі немесе оқу семинары ұйымдастырылмаған.
9 мамырдағы үміт — билік тарапынан кері жауап
9 мамыр күні Ауғанстандағы шахмат қауымдастығы елдің Спорт департаментіне ресми түрде хат жолдап, шахмат клубтарының жұмысын жандандыруға рұқсат сұраған. Алайда жауап ретінде оларға шахматтың ресми түрде тыйым салынғанын және федерацияның заңды мәртебесі жойылғанын хабарлаған.
"Құмар ойын" ретінде қабылданған
Жергілікті ақпарат көздерінің хабарлауынша, Талибан шахматты “құмар ойынның бір түрі” деп есептейді. Бұл интеллектуалдық спорт түрінің “ислам нормаларына сәйкес келмейтіні” себеп ретінде көрсетілген.